എന്നെ ഉദ്ദേശിച്ച് വൈക്കത്ത് നാലമ്പലത്തിന് പുറത്ത് വടക്കു വശത്ത് പന്ത്രണ്ടുദിവസം കളമെഴുത്തും പാട്ടും, കാലം കൂടുന്ന ദിവസം ഗുരുതിയും നടത്തിയാൽ ആപത്തൊഴിയുമെന്നും ഇങ്ങനെ പന്ത്രണ്ടു വർഷം കൂടുമ്പോൾ പതിവായി നടത്തിയാൽ മേലിൽ ഈ വിധമുള്ള ആപത്തുണ്ടാകുകയില്ലെന്നും പാട്ട് ഇന്നപ്രകാരം നടത്തണമെന്നും എന്നെ സങ്കല്പിച്ച് പൂജിച്ചിട്ടുവേണം പാട്ടു നടത്താൻ എന്നുമായി രുന്നു ദർശനം. അടുത്ത ദിവസം രാജാവ് ക്ഷേത്രസന്നിധിയിൽ ചെന്ന പ്പോൾ വെളിച്ചപ്പാട് ഉറഞ്ഞുതുള്ളി ഞാൻ തന്നെയാണ് അടുക്കൽ വന്നതെന്നും പറഞ്ഞതുപോലെ ചെയ്താൽ ആപത്തൊഴിയുമെന്നും കൽപ്പിച്ച് ഭസ്മം കൊടുത്തു അനുഗ്രഹിച്ചു. രാജാവും മറ്റുള്ളവരും വൈക്കത്തെത്തുകയും ദേവി കല്പിച്ചതുപോലെ ആഘോഷപൂർവ്വം പാട്ടും ഗുരുതിയും നടത്തുകയും ചെയ്തതോടെ പകർച്ചവ്യാധികൾ ഒഴിഞ്ഞു മാറിയതായും വിശ്വസിക്കപ്പെടുന്നു. ഇതിന്റെ അടിസ്ഥാന ത്തിൽ വൈക്കത്തപ്പന്റെ തിരുമുറ്റത്ത് വടക്കുവശം കൊടുങ്ങല്ലൂർ ഭരണി കഴിഞ്ഞു അടുത്ത നാൾ മുതൽ (കാർത്തിക) പന്ത്രണ്ടു ദിവസം പന്ത്രണ്ടു വർഷത്തിലൊരിക്കൽ കൊടുങ്ങല്ലൂർ അമ്മയെ ഉദ്ദേശിച്ചു പൂജാദികർമ്മങ്ങളും കളമെഴുത്തും പാട്ടും എതിരേൽപ്പും അവസാന ദിവസം വലിയ ഗുരുതിയോടെ പരിസമാപ്തിയിലെത്തുന്ന ചടങ്ങാണ് വടക്കുപുറത്തുപാട്ട് എന്നറിയപ്പെടുന്നത്.